Eskualdeak suspertzeko Aldundiaren 2014ko Programa hasteko, ehun pertsonarentzako enplegua sustatuko da Enkarterrin

http://www.bizkaia.net/home2/bizkaimedia

• Helburu nagusia da autoenplegua sustatzea, batez ere gazteen, iraupen luzeko langabeen eta lan-merkatura sartzeko zailtasun bereziak dituzten 45 urtetik gorako pertsonen artean.

• Enkarterri izango da programan parte hartuko duen lehenengo eskualdea; 1.500.000 euro daude Enplegurako Aparteko Funtsaren jardueren barruan egingo den programa honetarako.

• Aurten, bi deialdi egingo dira; haietako bakoitzean, eskualdeko hamaika udalerrietako 50 parte-hartzaile aukeratuko dira. Horrez gainera, parte-hartzaileek hilean 350 euroko diru-laguntza jasoko dute prestakuntza-fasean eta negozio-plana egiteko fasean, eta, behin enpresa abiarazten dutenean, 5.000 euroko diru-laguntza bat.

• Programak 2013. urtean Ezkerraldean eta Meatzaldean izandako emaitzei esker, 123 pertsonak lortu dute lana urte horretan, eta 118 enpresa berri sortu dira.

Aurten, Enkarterrira helduko da Bizkaiko Foru Aldundiak Eskualdeak Suspertzeko sustatutako programa. Eta aurrez ikusten da lanik ez duten 100 pertsona lan-merkatura sartzea negozio berriak sortuz. Imanol Pradales Ekonomia Sustatzeko diputatuak programaren xehetasunak jakinarazi dizkie Artzentales, Alonsotegi, Balmaseda, Karrantza, Galdames, Gordexola, Güeñes, Lanestosa, Sopuerta, Turtzioz eta Zallako alkateei eta enpleguko zinegotziei. Aurten, helburua da ehun pertsonaren ibilbide profesionala bideratzea eta haietatik ehuneko 60k gutxienez autoenplegurako beren ekimena sortzea. Imanol Pradalesek gogorarazi du erakunde hauen lankidetza duela erronka hori lortzeko: udalak, Dema elkartea, Enkarterri Green, Behargintzak eta toki-garapenerako beste agentzia batzuk.

Ekonomia Sustatzeko diputatuak azpimarratu duenez, programa honek bi erronka ditu: batetik, langabezian dauden pertsonei aukera ematea beren ibilbide profesionala bideratzeko eta lan-merkatura itzultzeko eta, bestetik, enpresa-ehun berri bat behar duen eskualde honetan hazi eta garatzeko ahalmena duten negozio berriak sortzea. Programa hau hainbat eskualdetan egingo da, eta 1.500.000 euroko inbertsioa izango du 2014. urtean. Programaren onuradunak langabezian egon behar dira eta Enkarterriko udalerrietako batean erroldatuta; bereziki kontuan hartuko dira iraupen luzeko langabeak, hogeita hamar urtetik beherakoak, berrogeita bost urtetik gorakoak eta aurretik autoenpleguaren esperientzia izan dutenak.

Programan aurrez ikusita dago aholkularitza eta laguntza pertsonalizatua ematea hiru fase hauetan: prestakuntzan, negozio-ideiaren garapenean eta enpresaren sorreran. Eskualdeak Suspertzeko Planean ezarritako laguntza ekonomikoa honelakoa da:onuradunek 350 euroko diru-laguntza jasoko dute lehenengo bi faseetan, eta, behin enpresa berria eratzen dutenean, 5.000 euroko beste bat, baldin eta enpresak gutxienez ere urtebete irauten badu aktibo. Aldundiak aurten programa honetarako bideratuko duen 1.500.000 euroko aurrekontua Enplegurako Aparteko Funtsetik dator. Funts horretarako, 4.000.000 euro daude guztira, eta, haren bidez, Ekonomia Sustatzeko Sailak lurralde historikoko ekonomia-ehuna pizteko jarduera berriak egingo ditu, Bizkaiko langabetuetan arreta berezia jarrita.

Ezkerraldean 2013. urtean lortutako emaitzak oso itxaropentsuak dira
Bizkaiko Foru Aldundiak Ezkerraldea Suspertzeko sustatutako Programari esker, 118 enpresa berri sortu dira 2013. urtean, eta 123 alta berri eman dira langile autonomoen araubide berezian. Ekonomia Sustatzeko Sailak honako helburua hau zuen iaz programa hori abiarazi zuenean: langabezian denbora luzea eman ondoren lan-merkatura itzultzeko zailtasun bereziak zituzten pertsonei lan-aukera bat ematea. Imanol Pradales Ekonomia Sustatzeko diputatuak adierazi duenez, Ezkerraldean lortutako emaitzak oso itxaropentsuak dira, espero zena nabarmen gainditu baitute. Izan ere, programan parte hartu duten berrehun pertsonetatik 123 hasi dira lanbide-jarduera berri batean Aldundiaren laguntzari esker, eta, horrez gainera, ezkerraldeak 118 enpresa berri daude programan parte hartu dutenen ahalegin, lan eta konpromisoaren ondorioz. 

Alta berrien ehuneko 38 emakumeei dagokie; adin-talde handiena berrogei urtetik gorakoena da, eta ehuneko 56 hamabi hilabete baino gehiago zeramatzan langabezian. Unibertsitateko tituludunak eta lanbide-heziketako goi-mailako gradua dutenak dira nagusi (% 58,5); lanbide-heziketako lehen zikloa edo bigarren hezkuntza dutenak gutxiago dira (% 22), eta lehen hezkuntza dutenak are gutxiago (% 19,5).  Negozio txikien artean, komertzio txikiak eta konponketak egitekoak dira gehienak, eta ekimenen laurdena osatzen dute (% 24,6).
Ondoren, zerbitzu profesionalak emateko negozioak daude (alta berrien % 19,5). Azkenik, jarduera hauek osatzen dute autoenpleguaren bideari ekion diotenen aukeren zerrenda: finantzak, aseguruak, enpresetarako zerbitzuak, energia, eraikuntza eta ostalaritza.

Informazio gehiago ftp://ftp.bizkaia.net/bizkaimedia/20140131_promocion_economica_enkarterri_reactivacion

BILBAO-BIZKAIAK BERE PRODUKTU TURISTIKO BERRIAK AURKEZTUKO DITU FITUR AZOKAN

Bizkaiko Foru Aldundiak eta Bilboko Udalak "be basque" eskaintza abiarazi dute lau aldizkaritan

Bilbao FIBA 2014 Munduko Saskibaloi Koparen aurreko faseko egoitza ofiziala izatea Euskadiren standaren alde erakargarrienetako bat izango da Fitur-en.

Bilbao-Bizkaiak hiri destino eta kultura, kostaldea, natura eta gastronomia eskaintzen dituen euskal unibertsorako sarrera gisa sustatuko du bere burua Madrilgo Azokan.

http://www.bizkaia.net/home2/

Bilbao-Bizkaia Fitur-ekin urtero daukan hitzordura joango da; Fitur turismoaren arloko munduko bigarren azoka garrantzitsuena da, eta Madrilen egingo da, urtarrilaren 22tik 26ra bitartean. Bizkaiko Foru Aldundiak eta Bilboko Udalak stand moderno bat partekatuko dute Eusko Jaurlaritzarekin, eta bertan Bilbao-Bizkaiaren "be basque" estrategia eta marka sustatuko dute lau aldizkari berriren bidez. Argitalpen landu horiek bi erakundeek aspalditik garatzen duten turistak erakartzeko politika indartu, eta bi eguneko batez besteko egonaldia luzatzeko berezko nortasuna eta alde erakargarri nahiko dituen eskaintza turistikoa bistaratu nahi dute.

Aurkezpen katalogo berriak

Hiria eta lurraldea turismo aldetik sustatzeko estrategia bera daukaten Bizkaiko Foru Aldundiak eta Bilboko Udalak oso proposamen erakargarriak eskainiko dituzte Madrilen, arlo hauek erreferentziatzat hartuta: hiri kultura, kostaldea, natura eta gastronomia.

• City & Experience. Aldizkariak Bilbo hiri helmuga gisa agertzen du, hiriaren gune turistikoa Bilbo administratiboa baino handiagoa dela eta metropoli arloa Bilbori lotutako hiri gune turistikoa dela ulertuta. Arreta berezia eman zaie itsasadarraren bi ertzetako udalerriei.
• The Sea in its soul. Aldizkariak Bizkaiko alde erakargarriak agertzen ditu: marinel herri harrigarriak, surfa egiteko hondartza ikusgarriak, labarretako ibilaldiak, kostaldeko ohiko sukaldaritza...
• Naturally!! Bilboko eta Bizkaiko natur guneak eta parkeak liburuxka honetako protagonistak dira. Zerurantz doazen mendiak, larre lasaiak agertzen dituzten haranak, ortuak dituzten baserriak, bide berdeak...
• Gastronomy & Enotourism. Euskal sukaldaritza ospetsua aldizkari honetako leitmotiva da, bertan Bizkaiko plater gozoak, lurreko produktuak edo azoka ikusgarriak nabarmentzen direla.

Fiba 2014 saskibaloiko munduko kopa

Bilbao-Bizkaiak FITUR-eko hitzordua aprobetxatuko du FIBA 2014 Munduko Saskibaloi Kopako egoitza den aldetik bere burua sustatzeko. Informazio triptikoa banatzeaz gain, hainbat jarduera antolatu dira, adibidez, saskibaloiko mitoak han izatea, esaterako, Femando Romay. Abuztuaren 30etik irailaren 4ra bitartean Bilbo saskibaloi onenaren munduko erreferentzia bihurtuko da. Bilbao Exhibition Centre (BEC) esparruko pabilioietako bat den Bizkaia Arenak FIBA 2014 Munduko Saskibaloi Koparen aurreko faseko 15 partidu hartuko ditu, guztira. FIBA 2014 Munduko Saskibaloi Koparen beste eszenatoki batzuk honako hauek dira: Bilbao Arena, entrenamendu pista gisa erabiliko dena, eta La Casilla pabilioia, saskibaloiaren zaleentzat eta pertsona guztientzat, oro har, hainbat jarduera eskainiko dituena.

Prestakuntza ikastaroak urtarrilean ustiategien kudeaketa eta natur ingurunea hobetzeko

 

Horretarako, urtarrilean hainbat ikastaro eta hitzaldi egingo dira.

Aurten nekazaritza- eta ingurumen-laguntzen onuradun diren 174 abeltzainek, urtarrilean, hainbat prestakuntza-ikastaro eta -hitzalditan parte hartuko dute, euren ustiategien kudeaketa eta natur ingurunea hobetzeko. Bizkaiko Foru Aldundiko Nekazaritza Sailaren ekimenez, HAZIrekin eta Europako Batzordearekin - Landa Garapeneko Nekazaritzako Europar Fondoarekin lankidetzan, prestakuntza saioen helburu bikoitzak "pertsona hauek nekazaritza eta ingurumen neurrien alde egiten duten apustu irmoa berresten du. Horregatik, prestakuntza hau eskaintzen dugu, kudeaketa egokia egiteko", azpimarratu du Irene Pardo aldundiko Nekazaritza diputatuak.

Foru dekretuz ezarritako nekazaritza eta ingurumen laguntzen onuradun direnez gero, pertsona horiek nahitaez etorri behar dira prestakuntza eta praktika jarduera horietara. Jarduerok aldundiko Nekazaritza Saileko eta Lorra kudeaketa zentroko teknikariek emango dituzte. Bigarrenez ematen dira, izan ere, abenduan hasi ziren, nekazariei zuzenduta. Jasotako prestakuntza horrekin lotuta, 301 ustiategiek, 2012an nekazaritza- eta ingurumen-prestakuntza jaso zuten 200ekin batera, guztira, 500 onuradun batzen dituzte, 800etik gora nekazaritza- eta ingurumen-konpromisorekin.

Hitzaldien egutegia hau da:

- Asteazkena, urtarrilak 15, 15:30ean, Matienako Txanporta Kultur Etxean. Hor, Markinako 14 ustiategik eta Durangoko 11k parte hartuko dute. 

- Osteguna, urtarrilak 16, 15:30ean, Igorreko Kultur Etxean. Hor, udalerriko 30 ustiategik parte hartuko dute.

- Asteartea, urtarrilak 21, 12:00etan, Karrantzako GUVACen. Hor, udalerriko 41 ustiategik parte hartuko dute.

- Asteartea, urtarrilak 21, 15:30ean, Balmasedako Kultur Etxean. Hor, udal mugarteko 45 ustiategik parte hartuko dute.

- Asteazkena, urtarrilak 22, 15:30ean, Derioko Nekazaritza Eskolan. Hor, Mungiako 16 ustiategik eta Gernikako 17k parte hartuko dute.

2,06 milioi, %8 gehiago, nekazaritza- eta ingurumen-neurrietarako 2014an

Bizkaiko Foru Aldundiko Nekazaritza Sailak 30,6 milioi euro izango ditu datorren urteari aurre egiteko: 2012an baino %3,03 gehiago, aldundiaren aurrekontu igoera globalarekin bat etorriz. Irene Pardo Nekazaritza Saileko diputatuak orain dela hilabete Bizkaiko Batzar Nagusietan hitz egin zuen, Batzar Nagusietako talde politikoei 2014ko aurrekontu proiektua aurkezteko. Orduan azaldu zuen nekazaritza, abeltzaintza eta basogintza sektoreei laguntza zuzenagoa ematen dieten kredituak hobetsi direla. Horregatik gehitu dira sail honen estrategian funtsezkoak diren ildoei dagozkien aurrekontuko partidak, hau da, nekazaritza eta ingurumeneko neurriak: 2,06 milioi euro, %8ko igoerarekin.

Eusko Jaurlaritzak eta Bizkaiko Foru Aldundiak metroaren 3. linea 2016an abiarazi ahalko dela aurreikusi dute

Eusko Jaurlaritzak eta Bizkaiko Foru Aldundiak lankidetza-hitzarmen bat sinatu zuten abenduak 27an Bilbon, Etxebarriko San Antonio/Matiko 3. metroko linea 2016an abiarazteko beharrezko finantzazioa bermatzeko. Protokolozko ekitaldia laster Zurbaranbarriko geltokia izango denean egin da, eta Bizkaiko ahaldun nagusi José Luis Bilbao, Eusko Jaurlaritzaren Ingurumen eta Lurralde Politikako sailburu Ana Oregi eta Ogasuneko sailburu Ricardo Gatzagaetxebarria izan dira bertan, baita Bilboko alkate Iñaki Azkuna, Etxebarriko alkate Loren Oliva, Itziar Garamendi foru-diputatua eta Garraioko sailburuorde Antonio Aiz ere.

2013-2016 aldirako akordio berri honen arabera, Bilboko metroaren 3. linea eraikitzeko amaierako kostua 279 milioi eurokoa izango da, eta erdibana ordainduko dute Eusko Jaurlaritzaren Ingurumen eta Lurralde Politika Sailak -ETS-RFV erakundearen bitartez- eta Bizkaiko Foru Aldundiak.

Bi erakundeek ordainduko dituzten urteko kuotak zehazten ditu hitzarmenak:

Finantziaketa	2013	2014	2015	2016
Eusko Jaurlaritza	15.400.000	21.000.000	22.000.000	19.002.189
Bizkaiko Foru Aldundia	15.400.000	21.000.000	23.000.000	24.390.693

 

Zerbitzua
Hirugarren lineak tren-loturak eskainiko ditu 7,5 minutuan behin Etxebarri eta Matiko artean, eta 70.000 pertsonari baino gehiagori emango die zerbitzua; hala, trenbide metropolitarraren geltoki bat izango dute horiek etxetik 10 minutura baino gutxiagora.

Hirugarren linearen trazatuak 5.885 metro ditu, eta zazpi geltoki: Etxebarriko San Antonio, Otxarkoaga, Txurdinaga, Zurbaranbarri, Casco Viejo (alde zaharreko geltokia), Uribarri eta Matiko; guztiak ere Norman Fosterrek Bilboko metroko 1. eta 2. lineetarako diseinaturikoen tipologia berekoak.

Hala, Otxarkoagatik Bilboko erdialdera joan nahi duen pertsona batek bost minutu baino ez ditu behar izango. Txurdinagatik, lau minututik behera iraungo du bidaiak.
Zurbaranbarriko geltokiari esker -sarbideak ditu auzoaren goiko eta beheko aldean- bi minutu baino gehixeago baino ez da beharko alde zaharreko geltokira iristeko.
Uribarriko geltoki berriak bost sarbide izango ditu, ahalik eta pertsona gehienei zerbitzua emateko. Matikoko geltokia (Tivoli kalean), berriz, lurperatu egingo da, eta atari berri bat zein igogailua duten nasak eta sarbideak egingo dira bertan. Artasamina aldean ere estali egingo da trenbidea; ondorioz, trenbide-lubakia kenduko da, eta auzo horretan bizi diren pertsonentzat beste gune publiko bat sortuko da. Matiko eta Alde Zaharreko geltokien arteko bidaia-denbora 3,30 minutukoa da, gutxi gorabehera.

Trenbide-eragiketa horren zentro neuralgiko bat Alde Zaharreko geltoki berria izango da; 2014an esleitzea aurreikusita dago, eta geltoki intermodal gisa funtzionatuko du, metroko 1. eta 2. lineekin lotzea ahalbidetuta, baita tranbiarekin eta Euskotreneko Txorierriko linearekin ere.

Alde zaharreko geltokia eraikitzeak oraingoa eraistea ekarriko du. Proiektatutako geltoki berriak oraingoaren eskema funtzional bera izango du.

Hirugarren lineak, batik bat, Bilbo iparraldeko auzoei emango die zerbitzua baina, horretaz gain, Bermeo, Durango edo Eibarretik datozen pertsonak hiriburuko erdialdera iristea ere ahalbidetuko du, bai eta Txorierrik, jada eraikitzen ari diren Artxandako tunel berriaren bidez, metro-sarearen gainerakoarekin beste trenbide-lotura bat edukitzea ere.

Era horretan, nabarmen hobera egingo du Txorierri, Durangaldea eta Urdaibai eskualdeetako zerbitzuaren funtzionalitateak Bilbo Metropolitarrari dagokionez, zerbitzu publikoaren eskaintza modu erakargarri eta eraginkorrago batez integratuko baitu.

Hitzarmen berriaren sinadura-ekitaldiaren ostean, ahaldun nagusi José Luis Bilbaok zera ziurtatu du: «Azpiegitura berri horren atzean giza ahalegin eta ahalegin tekniko eta ekonomiko izugarria dago, eta argi eta garbi erakusten du Bizkaiak konpromiso sendoa duela Bilboren eta Etxebarriren orainarekin eta etorkizunarekin, metroa igarotzen den udalerri guztiekin izan duena bezalakoxea». José Luis Bilbaok azpimarratu duenez, «gaurko ekitaldia erakundeen konpromisoari eta herritarrekiko eta udalerriekiko konpromisoari esker egin ahal izan dugu».

Ana Oregik sailburuak adierazi duenez, «Durangalde, Urdaibai eta Txorierriko garraio publikoaren eskaintza optimizatzea ahalbidetzen du trenbide-irtenbide horrek, Bilbo Metropolitarrarekiko trenbide-komunikazioak hobetuta; Txorierri EuskoTrenen sarearekin lotzea, eta, azkenik, komunikazioak bultzatzea eta hobetzea, bai Bilbo Handiarekin, bai aurretik aipatutako eskualdeen artean. Hau da, Durango edo Otxarkoagatik Zamudioraino trenez aldatu gabe bidaiatzeko aukera izango da».

Lanak
Oro har, BTMko 3. lineako lanak normaltasunez garatu dira, etorkizunean Txurdinagako geltokia egongo den tartean izan ezik, haren hondeaketa aldatu behar izan baitzen lantaldeek eremu karstiko bat topatu zutelako. Geltokian bertan eta hara iristeko tuneleko tarteetan eragiten du eremu horrek. Hartutako irtenbide teknikoa onartu ondoren, hondeaketari berrekin diote aurtengo udan. Gainerako zatiak, tunelak zein leizeak, amaiturik daude jada, baita haien estaldurak ere.

Ana Oregik bereziki azpimarratu du «Eusko Jaurlaritzak garraio-azpiegitura izugarri honen diseinuarekin eta gauzatzearekin» duen konpromisoa, eta honakoa erantsi du: «Lineak onura zuzena ekarriko die Bilbo iparraldeko auzoetako 82.000 emakumeri eta gizoni baino gehiagori, eta bermeotarrei, durangarrei eta eibartarrei hiriburura iristeko aukera eskainiko die, Txorierri, eraikuntza-prozesuan den Artxandako tunel berriaren bitartez, metroaren gainerako sarearekin lotuko duen trenbide-lotura berri bati esker».

Sailburuaren ustez «egun Bilboko metroak urtean eskaintzen dituen 90 milioi bidaiak biderkatu egingo dira laster zerbitzuan ikusiko dugun linea berriari esker. Era horretan, hobera egingo du Txorierri, Durangaldea eta Urdaibai eskualdeetako zerbitzuaren funtzionalitateak Bilbo Metropolitarrari dagokionez, zerbitzu publikoaren eskaintza modu erakargarri eta eraginkorrago batez integratuko baitu».

Kalitatea
Ana Oregik gogorarazi duenez, «3. lineari esker hobetu egingo da, halaber, gure auzoetako eta udalerrietako bizi-kalitatea eta ingurua, autoak denbora luzeagoz egongo baitira geldirik Txurdinagatik erdialdera minutu gutxian iristeko aukera dugunean. Metroa garraiobide jasangarri nagusietako bat da».

Euskadiko garraioaren arloko arduradun nagusien hitzetan «"Hiriko trenbide"aren -erabilitako azpiegitura, maiztasunak, estazioen arteko distantzia, eta abar- definizio klasiko baten arabera, metroa duten 180 hiri daude eta, guztira, 7.000 kilometro inguru linea. Sarerik handienak New Yorkekoa, Shangaikoa, Beijingoa eta Kantongoa dira, eta azken horiek etengabe jarraitzen dute hazten. Pixkanaka, Bilbo zerrenda horretan sartzeko bidean da».

«Bilbok eta bere inguruneak, eta haiekin Bizkaia osoak, garapenerako aukera gehiago izango dituzte». Laurogeiko hamarkadatik, ezinbestekoa izan da jarraitu beharreko noranzkoa goizero aurreikustea eta argi eta garbi zehaztea, hartara, Euskadin biztanle gehien dituen lurraldeko giza garapenean eta garapen ekonomikoan ematen ari garen urratsak hari egokitzeko», aipatu du Oregik.

Amaitzeko, honakoa erantsi du sailburuak: «Zorionez, hemengoa kontzertazio eta erakundeek ondo planifikaturiko lanaren adibide garbia da». Udalek, Foru Aldundiak eta Eusko Jaurlaritzak konpromiso sendoa dugu gure pertsonekin eta herritarrekin, eta mota guztietako ezbeharrak gainditzen ari gara, Bizkaia eta, harekin batera, Euskadi osoa punta-puntako lurralde bilakatzen eta harentzat etorkizun oparoa eraikitzen».


Albistearen iturria:  Euskadi.net

BIZKAIKO FORU ALDUNDIAK IGORREKO ZABORTEGIA ITXI DU

Zabortegiaren itxierarekin Bizkaiko Foru Aldundiak zabortegiak astiro-astiro ixten joateko hartutako konpromisoa beteko da. Igorrekoak urte eta erdiz edo bi urtez gehiago hondakinak jasotzeko ahalmena luke, gutxi gorabehera. 

2013ko abenduaren 31n hiri hondakinez betetako azken kamioia sartuko da Igorreko zabortegian. Bizkaiak itxi egin du azpiegitura hori, hondakinen kudeaketari dagokionez erakundeak hartutako konpromisoa betetzeko, baita Igorreko Udalarekin hartutako konpromisoa betetzeko ere. Izan ere, 1987tik zabortegia udalerri horretan egon da.
Lemoa eta Igorre artean dagoen Urkizu auzoan, 7 hektareako azalera batean, 1.081.928 tona hiri hondakin utzi dira guztira. Bota diren hondakinak birrintze eta trinkotze bidez tratatu dira, birringailu-trinkotzaile 2 behin eta berriro pasatuta. Gero, lurrekin estali dira egunero.
Edonola ere, zabortegia ez dago guztiz beteta; urte eta erdi edo bi urte gehiagorako bizitza izan dezake. Hala ere, zabortegia itxi egin da, Aldundiak zabortegiak astiro-astiro ixten joateko hartutako konpromisoa betetzeko.
Adostasun maila handiarekin Batzar Nagusietan onartutako Hiri Hondakinak Kudeatzeko Plana betetzen ari da Bizkaia.  Europako gidalerroak beteta, gainera. Jada 2012ko irailean, Europako Parlamentuak hau eskatu zion Batzordeari: hondakinen bilketa arrazionalizatzeko, hondakinen hierarkia eta hondar-hondakinak guztiz desagerrarazteko beharra kontuan hartuta. Eta, ondorioz, Europa mailan, pixkanaka, hondakinen zabortegiak debekatzeko eta birziklatzeko eta konposta egiteko erabili ahal diren hondakinen errausketa apurka-apurka desagerrarazteko proposamenak aurkezteko eskatu zion.

Ixteko lanak
Igorreko zabortegian ixteko hainbat lan egin dira, sortutako lixibiatuen bolumena gutxitzeko eta zabortegiaren ingurumena leheneratzea azkartzeko. Ixteko lanen inbertsioa, guztira, 1.590.400 eurokoa izango dela zenbatetsi da.
Lehenengo obra 2005eko maiatzetik abendura bitartean egin zen, 32.000 m²-ko azalera batean. Behin betiko ixteko bigarren obra partziala 2009ko apiriletik uztailera bitartean egin zen, 11.500 m²-ko azaleran.
2010, 2011 eta 2012. urteetan, aldi baterako estaltze-lanak egin ziren. Horretarako, dentsitate altuko polietilenozko geomintzak (1 mm-ko lodiera) erabili ziren, geoehun baten gainean jarrita. Itxiera hauetako bakoitzak 5.000 m² hartzen ditu, eta haien xedea da behin-behinekoz estalitako guneetan lixibiatu gutxiago sortzea, zabortegia behin betiko ixteko obra egin arte.

Transferentzia-gunea
Bizkaiko Foru Aldundiak 2013ko abuztuan hasi zituen Igorreko Hiri Hondakinen Transferentzia-gunea eraikitzeko lanak. Instalazio horietan eskualde horretako hondakinak jasoko dira, prentsatzeko eta azken helmugara eramateko. Garbiker sozietate publikoak gauzatuko duen proiektu honetan 2 milioi euroko inbertsioa egingo da.
Azpiegitura berria itxiko den zabortegiaren ondoan egongo da. Horrek orain dauden baliabideen optimizazioa ahalbidetuko du, baskula eta kontrolerako eraikina erabiltzen jarraitzeko aukera egongo baita.
Proiektu honen onura garrantzitsuenen artean, zabortegiaren itxieraz gain, hauek nabarmendu behar dira: Arratiako Mankomunitateko udalerriei (urtean 5.000 tona inguru sortzen dituzte) eskainitako zerbitzua hobetuko da eta garraioaren kostuak murriztuko dira. Hau da, Arratian bildutako hiri hondakinak Igorren trinkotuko dira, eta, handik, azken helmugara eramango dira; beraz, abantaila ekonomiko bat izatea eta kamioien joan-etorriak murriztea eragingo du.
Nabarmentzekoa da transferentzia-gune honetan hondakin handiak (altzariak, koltxoiak), inausketen eta lorezaintzako hondakinak eta 5. edukiontzikoak ere jasoko direla.

Albistearen iturria: Bizkaiko Foru Aldundia